Distinction dv bien et dv mal. XVI.
A difference d’vn & de l’autre eſt icy marquée
par la figure de cette Femme, qui eſt en la
fleur de ſon aage, & modeſtement veſtuë ; tenant
vn Crible de la main droite, & de la gauche
vn Raſteau.
Son habillement marque ſa grande moderation, fort conuenable à ſon aage, qui dans le milieu de ſa courſe eſt ſans doute plus capable de la vraye Raiſon, & de diſcerner le bien d’auecque le mal, que ne peuuent eſtre ny la Ieuneſſe, ny la Vieilleſſe. La raiſon eſt, pource que l’vn de ces deux aages peche par un excez de paſſion, & l’autre par vn deffaut de memoire, & de iugement.
Et d’autant que le propre du Crible eſt de ſeparer le bon grand d’auec le mauuais ; c’eſt pour cela qu’il eſt mis icy, comme dans Pierius, pour le Hieroglyphe d’vn homme parfaitement ſage. Car ceuy qui ne l’eſt pas, ne peut ny faire la diſtinction des Vices & des Vertus, ny rechercher les ſecrets de la Nature, ny purifier non plus ſes actions, & comme dit le Prouerbe, les faire paſſer par le Crible. Auſſi n’eſtoit-ce pas ſans myſtere que les Preſtres Egyptiens en prenoient vn à la main, toutes les fois que par de ſubtiles conjectures, ils vouloient tirer quelque preſage de l’aduenir.
Le Raſteau qu’elle tient en main a la meſme proprieté que le Crible ; Et voilà pourquoy le Laboureur s’en ſert d’ordinaire, pour arracher les herbes nuiſibles : Ce qui doit apprendre à l’homme d’en faire de meſme de ſes mauuaiſes inclinations, & de les retrancher entierement de ſon ame, de peur qu’il ne les puiſſe deſraciner, ſi elles ſe tournent vne fois en habitude.
