Enfant d’honneur, lave tes mains
A ton lever, a ton disner, [1]
Et puis au soupper sans finer, [2]
Ce sont trois foys a tout le moins.
Enfant, dy benedicite
Et faiz le signe de la croix, [3]
Ains que tu prens riens, se m’en crois, [4]
Qui te soit de necessité.[5]
Enfant, quant tu seras aux places
Ou aucun prelat d’eglise est,
Laisse luy dire, s’il luy plaist,
Tant benedicite que graces.
Enfant, se prelat ou seigneur
Te dit de son auctorité
Que dies benedicite
Fais le hardiement, c’est honneur.[6]
Enfant, se tu es en maison
D’autrui, et le maistre te dit
Que tu sees, sans contredit[7]
Faire le peulz selon raison.[8]
Enfant, prens de regarder peine[9]
Sur le siege ou te sierras,
Se aucune chose y verras
Qui soit deshonneste ou vilaine.
Enfant, quant tu seras assis
Pour ton corps refectionner,
Soit au soupper ou au disner, [10]
Monstre toy prudent et rassiz.
Enfant, prens du vin et du pain
Ce qu’il souffist a ta nature,
Sans trop ne peu selon mesure,
Qui trop en prent est dit villain.[11]
Enfant, tu ne te doibs charger
Tant de ta premiere vïande,
Se plusieurs en as en commande, [12]
Que d’autres ne puisses menger.
Enfant, se tu es bien scavant,
Ne més pas ta main le premier[13]
Au plat, mais laisse y toucher
Le maistre de l’hostel avant.[14]
Enfant, garde que le morseau[15]
Que tu auras mis en ta bouche
Par une fois, jamais n’atouche,
Ne soit remis en ton vaisseau.[16]
Enfant, ayes en toy remors[17]
De t’en garder, se y a failly,
Et ne presentes a nulluy[18]
Le morseau que tu auras mors.
Enfant, garde toy de maschier
En ta bouche pain ou vïande,
Oultre que ton cuer ne demande
Et puis après le recrascher.[19]
Enfant, tu doibs prendre du sel
Dessus ton taillour, et saloir[20]
Ta vïande pour mieulx valoir,
Ou dedans ung autre vaissel.
- ↑ — 10 a ton] et au de, et a fg
- ↑ — 11 Et pareillement à s. fg
- ↑ — 14 Faisant le fg
- ↑ — 15 A. q. prendre se tu me c. de fg
- ↑ — 16 Ce qui t’est de, Ce qui est fg
- ↑ — 24 hardiment de fg
- ↑ — 27 t. s.] t’assies de, te sees f, tu te tais g
- ↑ — 28 s.] car c’est de fg
- ↑ — 29 Enfans A
- ↑ — 35 au] a d e f g
- ↑ — 40 e. d.] il est d e f g
- ↑ — 43 p. as f
- ↑ — 46 ta] la d e f g
- ↑ — 48 d’hostel g
- ↑ — 49 gardez A
- ↑ — 52 remise A
- ↑ — 53 t. cer. d e f g
- ↑ — 55 De non presenter de, Ne presente point f, Ne presenter point g ; a autruy fg
- ↑ — 60 le] la A
- ↑ — 62 trenchoir f, trenchouer g ; saler d e f g