E paſſet ſeine laige u ga de bale
Et chel porcers en feſt la traicion
El en ac eniſloc ſon gaardon
Car en ꝑdet lo cap au brat milon
Aiſi doit lon menar encre felon
Girarz lo cons ſen uait a eſperon
Toz nus pez e en langes e ſens caucon
Fors ſon oberc ueſtit ſenz aucoton
E no ſunt mais o lui trei conpainon
E cō el uen el bruel ſoz mōt argon
Lai encontret gilbert lui e folcon
Seinor or eſgardas confuſion
Eu uuel tornar arere uers loſt carlon
Car ma muller mainent franc o friſon
E gilbers reſpondet doz aico non
Nel place a damledeu lo rei del tron
Que ia uos metez en tau bandon
Aiſi com il menauent iſte razon
El gardet ſobre deſtre ꝑ un canbon
Veit uenir ſa muller e don boſon
Qui la tent denant ſei ſobre larcon
E at ꝑmi leſcut daſte un troncon
De fors pendent leſ lenges dū gofanon
Autre en ac ꝑ la teſte del ſor gaſcon
Ben ſemble cheualer quen coite fon
Fait maueis dis girarz ſeruiſe bon
Deus me dun queus en rende lo gaardon
Queſt ꝑforcis ꝑ armes e bons gerrers
E don can cꝛguſteſt tauſt deſtorbers
Annem en a diion ſempres pimers
Li caſtels eſt toz dobles murs e terrers
E mandez borgeinons e les bouers
E prenez gant maiſnade de ſoudeers
Noi remaine a donar aurs ne deners
Ni henas ne graaus ne candelers
E ſe carles i uent e ſos enpers
Ne preſerem aſaut dous faus laners
Ml’t eſſez dis girarz bons conſeillers
Tote noit chauaugerent ꝑ un ſenders
Entrerent en diion ꝑ ponz pimers
Apelunt a la porte ubrez porters
Cel les coinuc e obre uolentiers
E deſcent au perun lon la cairie
E entrat el moſter ſainte marie
E pia damlideu canz ne locie
Trues de carlon martel uenianz ſe ſie
Com a fait ſorazon e meſſe auie
Eiſit fors del moſter quāt fu fenie
E trobe ſa maiſnade ſi lor dezie