Que celuy qui tient tout feit un commandement
Au bon père Abraham de vouloir tousjours faire
Ce que diroit Sara, s’il luy vouloit complaire.
Celuy qui nous sauva, estant ressuscité,
Monstra premièrement sa saincte humanité
Aux dames. Trismegiste et plusieurs autres sages
Nous en ont délaissé maints sérieux passages.
Tous disent que le lieu sans femmes habité
Est comme un vray désert du tout inhabité,
Et qu’on doit grandement fuir Inhumaine race
A qui ne plaist d’hanter la féminine grâce.
Où est l’honnesteté, où les chastes propos,
Où le plaisant mesnage et où le doux repos.
Si ce n’est à la femme, à qui toute influence
De biens tombe du ciel en prodigue abondance ?
Aussi voilà pourquoy toutes les vertus ont
Des femmes retenu le nom, veu qu’elles sont
D’honneur et de vertu beaucoup plus excellentes
Que des hommes ne sont les grand’s troupes errantes.
Page:Romieu - Oeuvres poetiques.djvu/35
Le texte de cette page a été corrigé et est conforme au fac-similé.
