Fantaſie a ſa Dame.
Il estoit nuit, & le preſent des cieus
Plus dous que miel, couloit dedans mes yeus,
Lors que par l'air ie me ſenti raui,
Et transformer en nue ie me vi
Pleine d’amour, & de perſeuerance,
De loiauté, d’attente, & d’esperance:
Apres auoir, ce me ſembloit, erré
Par tout le ciel, d’une nüe enferré,
Vos yeus ſur moi leurs raions espandirent,
Et comme neige au ſoleil me fondirent,
Si que d’enhault ie pleuuoy l’eſperance,
La loiauté, & la perſeuerance.
En un rocher apres il me ſembla,
Que tout mon corps vistement s’aſſembla:
Le ciel depit me tourmentant la teste,
Ore de greſle, & ores de tempeste,
Le vent mon dos, & la mer rụdement
Se courouçoit contre mon fondement,
Voulant la foi rompre & diminuer,
Que ie vous veus touſiours continuer.
Mais en penſant au tourment de ma peine,
Pour la rigueur dont vous estes tant plaine,
De trop pleurer en larmes distilloi,
Et peu a peu fontaine ie couloi,
Si que par prez, & par bois, en fuiant
I'aloi touſiours murmurant & bruyant
Contre mes bords, vostre nom que i’adore:
Nom que ie puis, & le veus faire encore,
