Page:Ronsard - Le Bocage, 1554.djvu/72

Sur quatre grands ailes dorées :
En maintes lames colorées
Son dôs luiſoit par la moitié,
Luy courageus, ayant pitié
De voir au meillieu de la guerre
Silene, & ſon aſne par terre,
Piqua cest aſne dans le flanc
Quatre ou cing coups iuſques au ſang,
L’aſne qui soudain ſe reueille
Dessous le vieillard, fiſt merueille
De ſi bien mordre a coups de dens,
Ruant des pieds, que le dedans
Des plus espeſſes embuſcades
Ouurit en deus de ſes ruades,
Tellement que lui ſeul tourna
En fuite l’Indois, & donna
A Bacus qui fuyoit, la gloire
Et le butin de la victoire.

Lors Bacus, en lieu du bien fait
Que les freſlons luy auoient fait,
Leur ordonna pour recompence
D’auoir a tout iamais puiſſance
Sur les vignes, & de manger
Les raiſins, pres a vandanger
Et boire du moust, dans la tonne
Impuniment, lors que l’Autonne
Amaſſe des coutaus voiſins
Dedans le preſſouer les raiſins,
Et que le vin nouueau s’écoule
Du piéd du gacheur qui le foule.