Cette page n’a pas encore été corrigée
XX
Quoy ? me donner congé de servir toute femme,
Et mon ardeur esteindre au premier corps venu,
Ainsi qu’un vagabond sans estre retenu,
Abandonner la bride au vouloir de ma flame :
Non, ce n’est pas aimer. L’Archer ne vous entame
Qu’un peu le haut du cœur d’un traict foible et menu.
Si d’un coup bien profond il vous estoit cognu,
Ce ne seroit que soulfre et braise de vostre ame.
En soupçon de vostre ombre en tous lieux vous seriez :
A toute heure en tout temps jalouse me suivriez,
D’ardeur et de fureur et de crainte allumée.
Amour au petit pas non au gallop, vous court,
Et vostre amitié semble à celle de la Court,
Où peu de feu se trouve et beaucoup de fumée.
