| C.4—6. | Anno sexto Edwardi I. | A.D. 1278. |
du de lui par qui set il est vouche. En mesme la manere le issue del fiz par bref del ael cosin e del besael. Ensement en mesme la manere ne seit le hier la femme apres la mort le pere e le mere barre de action par la chartre sun pere si il demaunde le heritage ou le manage la mere par bref de entre qe sun pere en tens sa mere aliena dunt nule fin est levee en la Curt le Rey.
ENsement si home lest sa terre a fee ferme ou a trouver estovers en vivre en vesture qe munte a la quarte partie de la verri value de la terre e celui qi tient la terre issint charge la lesse gisir frische issi qe lem ne pusse trover destresce par deus anns ou treis saunz ent fere la ferme rendre ou saunz fere ceo que est contenu en lescrit del les establi est qe apres les deus anns passez eit le lessour actioun a demaunder la terre en demeine par bref qe il avera en la Chauncelrie. E si celui vers qi la terre est demaunde veigne avaunt jugement e rende les arrerages e les damages e trove seurte tele com la cort verra qe seit suffefaunte a rendre en apres ceo qe est contenu en le escrit si retiegne la terre. E si il demoert desqe taunt qe ele seit recovre par jugement si seit encorue a remanaunt.
E Nsement purveu est qe lem eit desoremes bref de Wast en la chauncelrie fait de ceo sur home qi tient par la lei de Engleterre ou en autre manere a terme de vie ou a terme de annz ou femme en doweire : e celui qui serra ateint de wast perde la chose qil ad wastee e estre ceo face gre del trebble de ceo qe le wast serra taxe. E endreit de wast fet en garde seit fait folom ceo qe il est contenu en la graunt chartre. E par la ou il est contenue en la graunt chartre qe celui qi avera fet wast en garde perde la garde Acorde est qe il rende al heir les damages del wast si issi ne seit qe la garde perdue ne suffice my a la value des damages avaunt le age del heir de mesme la garde.
Purveu est ensement qe si home moert & eit plusurs heirs dunt le un est fiz ou fill ie frere ou soer nevewe ou nece e les autres soient en plus lointcing degre les heirs eient desoremes recoverer par bref do la chauncelrie de mort de auncestre.
