Le texte de cette page a été corrigé et est conforme au fac-similé.
142
LI DIZ DE LA VOIE DE TUNES.
Il est sires de loiz et c’est maîtres de droiz ;
Toz jors le trovereiz droit juge en toz endroiz.
Li besoins est venuz qu’il a mestier d’amis ;
Il ne quiert que le cuer de quanque en vos a mis.
Qui le cuer li aura et donei et promis,
De resouvoir son reigne c’eirt mult bien entremis.
Li mauvais demorront, ne’s convient pas eslire,
Et c’il sunt hui mauvais il seront demain pire ;
De jour en jour iront de roiaume en empire[1],
Se nos ne’s retrouvons si n’en ferons que rire.
Li Rois qui les trois rois en Belléem conduit,
Conduie touz croisiez qui à mouvoir sunt duit,
Qu’osteir au soudant puissent et joie et déduit,
Si que bonnes en soient et notes et conduit !
Explicit.
- ↑ Voyez pape 21, note 4.
