Page:Rutebeuf - Oeuvres complètes, recueillies par Jubinal, tome I, 1839.djvu/226

194

DES RÈGLES.

Puis lor covient laver les james^[1].
Or i a unes simples fames
Qui ont envelopé les cols,
Et sont barbées comme cols^[2],
Qu’à ces saintes genz vont entor,
Qu’eles cuident au premier tor
Tolir saint Pière sa baillie ;
Et riche fame est mal baillie
Qui n’est de tel corroie çainte :
Qui plus bèle est, si est plus sainte.
Je ne di pas que plus en facent^[3],
Mès il samble que pas n’es hacent ;
Et saint Bernars dist, ce me samble :
« Converser homme et fame ensamble
Sanz plus ouvrer selonc nature,
C’est vertu si nète et si pure
(Ce tesmoingne bien li escriz)
Com de ladre fist Jhésus-Chriz ! »
Or ne sai-je ci sus qu’entendre.
Je voi si l’un vers l’autre tendre
Qu’en .i. chaperon a .ij. testes,
Et il ne sont angles ne bestes.
Amis se font de sainte Yglise,
Por ce que en plus bèle guise
Puissent sainte Yglise sozmetre,
Et por ce nous dit ci la lettre :
« Nule dolor n’est plus fervant

1. Ms. 7633. Var. Jambes.
2. Les Béguines, qui avaient le cou enveloppé de la coiffure qui a pris son nom de leur ordre (béguin), ou qui le lui a donné.
3. Voyez pour ce reproche Li Diz des Béguines et la 11^e strophe de La Chanson des Ordres.