Page:Rutebeuf - Oeuvres complètes, recueillies par Jubinal, tome I, 1839.djvu/431

399

ET ÉCLAIRCISSEMENTS.

La joie de cest siècle, sachiez, mult petit vaut :
Quant miex i cuid’on estre et ele plus tost faut ;
Mès la joie des ciex qui lasus est en haut
Fu et est et sera, ne jà n’aura défaut.

Batons tant dis le fer com est chaut sor l’enclume,
S’aprendons à voler ainz que nos faille plume.
Si esprendons le feu qui si longuement fume,
Quar nos ne veons goute se Diex ne nos alume.

Nous resamblons la taupe qui ot et pas ne voit,
Quar nos ne veons goute à fère nostre esploit.
Nos oions les sermons c’on dit et amentoit,
Se n’i a cil ne cele qui par ce chastoit.

Cil n’aime mie Dieu qui ne le crient et doute
Et qui n’i met son cuer et sa penssée toute :
Qui est en droit chemin et il se part de route,
Cil resamble la taupe qui ot et ne voit goute.

Il n’i a cil ne cele qui ait point de demain ;
Tant comme chascuns a le cuer haitié et sain
Devons Dieu apeler et au soir et au main :
Lessons aler la paille, si retenons le grain.

Tant com nos sommes jone, nos sommes si coarts ;
Et nostre sire Diex si aime miex le quart
Le servise d’un jone qu’il ne fet d’un viellart,
Ne de l mauvès ouvrier qui commence trop tart.

L’en doit en son bon point le bien encommencier,
Quar qui plus tost commence miex desert son loier :
Ne fètes mie ausi com li mauvès ouvrier
Qui commencent si tart qu’il faillent au paier.

Tant com vostre bon vin sera frais et novel,
Donez-en vostre ami, lui ert et bon et bel ;
N’atendez mie tant qu’il porisse el tonel ;
Quar l’en pert le bon vin par le mauvès vessel.

Quels est or li vessiaus qui le bon vin empire ?
C’est li chetis de cors qui tret l’âme à martire.
Se li cors voloit fère ce que l’âme désire,
Mult covendroit au cors de ses bons escondire.