Chi après vous sera clèrement desploïe
Et depuis qu’il fu nés en orde poursievie
Se loenge est si bele et si autorisie
Qu’ele doit vilain cuer purgier de vilenie,
Et d’armes esmouvoir toute chevalerie,
Et de joie eslever cuer d’amant et d’amie.
Ne sai quel ménestrel l’avoient depêchie,
Mais jou Adans d’Arras l’ai à point radrechie[1],
Et, pour chou c’on ne soit de moi en daserie,
On m’apele bochu, mais je ne le sui mie.
Deus fust se ceste estoire éust esté périe,
Car peine i est si bien et si biel emploïe
Et me créanche est tele, et pour che je m’afie
Que pour l’amour du Roy m’en iert Diex en aïe,
Car il l’ama et fist tant pour lui en sa vie
Que je croi qu’il plaist Dieu que je l’ai commenchie ;
Et d’autre part j’ai si ceste oevre encoragie
Que je croi qui m’en cuer fenderoit à moitie
Du bon prinche i veroit le figure entaillie.
Li mainés fiex leur père fu Charles li gentiex,
Mais aussi proprement comme mais et avriex
Entre les autres mois est biaus et dous et piex,
Fu Charles li plus gens et li plus signeriex.
Tout furent filz de roy, mais Charles le fu miex,
Car au jour qui fu nés estoit la poestiex
Li pères dou roiaurne et sacrés et esliex :
Che n’iert-il quant il eut ses .iij. primerains fiex.
Or dirai de s’enfanche, il en est chi bien liex.
Enfès fu bien veignans, gracieus et soutiex,
En doctrine entendans, de meffaire doutiex,
Servichaules, rians, de servir volentiex ;
As chiens et as oîsiaus par nature ententiex,
Et pour chou n’estoit-il des dames mie eskiex,
Ains l’en metoit amours des plus beles à kiex.
- ↑ Il ne faut pas confondre, comme l'a fait M. Beuchot dans la Biographie universelle, Adam de la Halle, qui vivait vers le milieu du 13e siècle et était surnommé le Bossu d’Arras (qualification remarquable et qu’a oublié de lui donner, dans la même biographie, M. Pujoulx), avec Adam de Saint-Victor, chanoine régulier, mort vers la fin du siècle précédent (1177), et qui n’était pas un trouvère M. Monmerqué, dans l’édition du Jeu de saint Nicholas, qu’il a donnée pour la Société des Bibliophiles, a également commis une erreur en disant qu’Adam de la Halle était surnommé le Bossu d’Arras à cause d’une difformité. On voit dans notre poëme Adam lui-même affirmer le contraire.
