Si fu li orguex abatuz
C’onques nul n’en vout retenir :
A Dieu en lessa convenir.
El non du Père espérital
Fonda iluec .i. hospital ;
Iluec couchoit à grant honor
Mult de povres Nostre Seignor.
A boivre, à mengier lor donoit,
Tout le sien i abandonoit.
De ses amis en fu blasmée,
Et lédengie et mésamée,
Et clamée fole et musarde,
Por ce que les povres regarde.
Quant tels choses pooit oïr,
Riens ne l’ pooit plus esjoïr.
En paine, en tribulacion
Et en sa grant temptacion,
La conforta, ce dist l’estoire,
Après Dieu le pape Grigoire,
Qui par lettres la saluoit
Et mult d’escriz li envoioit
Où mult avoit enseignement
Por qu’ele vesquist chastement,
Examples de sainz et de saintes
Et de douces paroles maintes ;
Et li prometoit à avoir
Avoec tout ce .i. douz avoir :
C’est la joie de paradis,
Que li saint conquistrent jadis.
S’ele vousist greignor avoir,
Grant seignorie et grant avoir
Éust éu plus que devant :
Page:Rutebeuf - Oeuvres complètes, recueillies par Jubinal, tome II, 1839.djvu/203
Le texte de cette page a été corrigé et est conforme au fac-similé.
196
LA VIE SAINTE ÉLYSABEL.
![](http://upload.wikimedia.org/wikipedia/commons/thumb/c/cc/Rutebeuf_-_Oeuvres_compl%C3%A8tes%2C_recueillies_par_Jubinal%2C_tome_II%2C_1839.djvu/page203-1024px-Rutebeuf_-_Oeuvres_compl%C3%A8tes%2C_recueillies_par_Jubinal%2C_tome_II%2C_1839.djvu.jpg)