Page:Rutebeuf - Oeuvres complètes, recueillies par Jubinal, tome II, 1839.djvu/375

368

NOTES

Metons-nos à terre à genous.
Dementiers qu’eles entendoient
A celi où eles juoient,
Faisoit-ele ses orisons
Et paioit ses afflictions
K’ele avoit promis et voué,
Ausi com s’ele éust jué,
Si que garde ne s’en donoient
Celes qui avoec li estoient.
Se d’aucun ju s’entremetoit,
Aniaus ou deniers i metoit.
Si com cil enfant de jovent
Seulent entr’aus juer sovent,
La dime adiès en recevoit
Et tot coiement le donoit
A ces plus povres puceletes
Où eles savoit les disietes.
Cil bien de cele douce enfance
Faisoient au mont démonstrance
De plus grans biens en avant
Ki puis li soit venu devant ;
Car tout par ama netée
Et por garder sa castée,
Jà fust ce que Diex li éust
Porquis mari c’avoir déust :
Jehain l’évangélîste eslist
A son ami, si com on dist.
En sa vie, qui mult doit plaire,
Ne péust trover essamplaire
D’eslire millor ne plus fin
Por li garder dusk’en la fin.
Kant feste d’un apostle estoit
Plus en orisons se metoit
Et si prioit privéement
Son ami qui mult doucement
Li faisoit adiès sa besoigne ;
N’ele ne queroit pas cacoigne ;
Ains quist adiès le preu de s’âme,
Kant fu meskine et quant fu dame,
Kant d’aler dormir ert contrainte
Et sa lumière ert estainte
Se le jor n’avoit éu lieu
Trestot son veu paioit à Dieu.
El lit le restoroit si bien