et d’argent et de pierres précieuses, et tous les despens de ces castiaus, et le nous doune pour çou que nous ne brissons le triuvve ki est entre nous et aus. Et saciés que li grans rois d’Ysraël a de son poestet .cc. rois ki tout tienent de lui et tout obéissent à lui, et si a .ij. mile princes et .iij. c. sous li. Par sa tierre keurent .ij. fluns de Paradis ; et li mont où nos avons nos castiaus ont non Gos et Magos ; et pour çou sont-il issi apielet qu’il furent .ij. frères de la lignie d’Israël ki gardent ces mons. Et nostre ancissour les gaaignièrent de ces .ij. frères ; et au piet de cele montagne ki est deviers Ysraël avons-nous .i. autre roi en une chité ki est apielée Oriande pour çou qu’ele est viers oriant ; et sachiés que tuit cil ki mie matin se levèrent ne le prenderoient se n’estoient par traïsson ; et en cele chité maint li rois ki le garde pour nous, et reçoit le tréut cescun an dou grant roi d’Ysraël ; et nos gens sont illuec, et leur femmes, et leur garnissons Gos et Magos ; et nostre gent si vont seurement par la tierre le grant roi d’Ysraël, et li sien vienent bien dusqu’en nostre cité, et vendent et acatent fors de nostre vile ; car nous ne volons ne ne devons k’il entrent en nostre cité, n’en castiel que nous aions ; mais il vienent bien au mandement des nostres fors de nostre chité ; et quant nous lor faissons guerre, nous les prendons bien tous à no volenté ; s’ocions les viellars, et les enfans retenons od nous pour nous siervir, et les escoullons tous ; car li houme et les femmes de cele lierre sont les plus caudes gens dou monde et toutes les plus orgilleuses. Et delès cel mont est uns désiers où nus n’ose habiter pour la calour, et en cel désiert keurt uns fluns de pourre que nus hom ne puet trespasser ; nenmains, quant li vens se fiert ens et lors s’espart par la tierre et par l’air, adont i puet-on bien
