CHASTIE-MUSART.
Que que li autre facent, de parler ou de taire,
Ge dirai mon plaisir, à qui doie desplaire ;
Quar, ainsi l’ai oï en proverbe retraire,
Por son bon aconplir doit-l’en folie faire.
Seignor, tex est li siècle, bien le devez savoir :
Li un dient folie et li autre savoir,
Li uns est toz jors povres et l’autre plains d’avoir ;
Mais que que chascuns dient, ge ne puis riens avoir.
L’en tient le povre à fol et le riche à saige,
Mais d’itant a li povres .i. mult grant aventaige,
Qu’il puet dire son boen, si li vient à corage :
De trestot le plus cointe jà n’en plaiera gaige.
Ce ne fait pas li riches, ainz oreille et escoute :
Son avoir, qu’il crient perdre, le fait aler en route ;
Et li povres que fait ? Cestui fiert, celui boute,
Quar hom qui n’a que perdre ne crient riens ne ne dote.
Tant ai esperonné que sui venu au saut.
Se ne di mon pensé, trestot ce que me valt ;
Ge l’ dirai totes voies comment que li plet aut,
Qu’assez a gent el monde don gaire ne me chaut.
L’en dit que fol et povre ont mult large collier ;
Mais cil par est trop fox qui tancié vielt rallier,
Qu’en n’en puet sanz grant paine à grant bien ravoler,
Ne plus que li oiseax puet sanz èles voler.
