IX. — Page 205.
Par devant André Bouret et Louis Pourat, notaires garde nottes du roy.... fut presente en sa personne damoiselle Anne Gohory, fille majeure.... demeurant à Paris, rue des Lions, au logis de M. le marquis de Sevigné, paroisse Saint Paul, estant au lit, malade de corps, touteffois en bonne santé d’esprit, etc.... Declare la dicte damoiselle testatrice qu’elle n’a demeuré pres la personne de madame la marquise de Sévigné depuis son mariage que par pure affection qu’elle luy a toujours portée et porte pour l’avoir la dicte damoiselle testatrice eslevée toute jeune et n’ayant jamais eu dessein de luy demander aulcune recongnoissance n’y apointements, depuis le dict temps, ayant eu assez de bien de son chef pour s’entretenir honnorablement, et touteffois, en tant que besoing est ou seroit, elle en quitte et descharge la dite dame marquise de Sevigné et monsieur le marquis son espoux, a laquelle dame de Sevigné elle a en oultre donné et legué, donne et legue par ces presentes toutes les sommes de deniers qu’elle luy peut debvoir , a quelques sommes qu’elles se puissent monter contenues en ses promesses, que la dicte damoiselle testatrice veult lui estre rendues incontinent apres son deces par madame de Colanges, a la quelle elle les a baillé, il y a quelque temps.
Comme aussy luy donne et legue la somme de dix huict cens liures qui lui est deue par M. de Colanges, Sr de Saint Aubin, par contract passé par devant notaire, laquelle elle a aussi mis es mains de la dicte dame de Colanges, laquelle elle supplie de lui vouloir bailler et delivrer a la dicte dame de Sevigné, incontinent le dict deces d’elle testatrice arrivé. Et de plus elle a encore donné et legué a la dicte dame de Sevigné tous et chacun ses habits, linge et vaisselle d’argent et hardes generallement quelconques qui se pouront appartenir a la dicte damoiselle testatrice et estre en la maison de la dicte dame marquise de Sevigné, au jour du deces d’icelle damoiselle testatrice ; a la reserve et exception de son plus beau mouchoir de col, de point fin de Flandre, et d’une juppe de satin a fleurs fond vert, garnye de point fin, d’or et de soie, qu’elle donne a madamoiselle de la Trousse, fille de madame de la Trousse ; et de sa robe de taffetas qu’elle donne a madamoiselle du Verdier, estant pres
