estant posé, auec la galette, l’huile, haches et autre chose qu’on y veut mettre, on la referme, puis de dessus on iette deux bastons ronds, chacun de la longueur d’vn pied, et gros vn peu moins que le bras ; l’vn d’vn costé pour les ieunes hommes, et l’autre de l’autre, pour les filles : (Ie n’ay point veu faire cette ceremonie de ietter les deux bastons en tous les enterremens ; mais à quelques vns,) et ils se mettent après comme lyons, à qui les aura, et les pourra esleuer en l’air de la main, pour gaigner vn certain prix, et m’estonnois grandement que la violence qu’ils apportoient pour arracher ce baston de la main des vns et des autres, se veautrans et culbutans contre terre, ne les287||estouffoit, tant les filles de leur costé, que les garçons du leur.
Or pendant que toutes ces ceremonies s’obseruent, il y a d’vn autre costé vn Officier monté sur vn tronc d’arbre, qui reçoit des presens que plusieurs personnes font, pour essuyer les larmes de la vefue, ou plus proche parente du deffunct : à chaque chose qu’il reçoit, il l’esleve en l’air, pour estre veuë de tous, et dict : Voilà vne telle chose qu’vn tel ou vne telle a donnée pour essuyer les larmes d’vne telle, puis il se baisse, et luy met entre les mains : tout estant acheué chacun s’en retourne d’où il est venu, auec la mesme modestie et le silence. I’ay veu en quelque lieu d’autres corps mis en terre (mais fort peu) sur lesquels il y auoit vne Cabane ou Chasse d’escorce dressée, et à l’entour vne haye en rond, faicte auec des pieus fichez en terre, de peur des chiens ou bestes sauuages, ou par honneur, et pour la reuerence des deffuncts.
