Sagamité pendant l’hyuer, c’est pourquoi ils en font grand estat, aussi bien que du grand poisson, et afin qu’il fasse mieux sentir leur potage, ils ne l’esuentrent point, et le conseruent pendu par monceaux aux perches de leurs Cabanes ; mais ie vous asseure qu’au temps de Caresme, et quand il commence à faire chaud, qu’il put et sent si furieusement mauuais, que cela nous faisoit bondir le cœur, et à eux ce leur estoit musc et ciuette.
En autre saison ils y peschent à la ceine vne certaine espece de poisson, qui semble estre de nos Harengs, mais des plus petits, lesquels ils mangent fraiz et boucanez. Et comme ils sont tres-sçauans, aussi bien que nos pescheurs de Moluës, à cognoistre vn ou deux iours pres, le temps que viennent les poissons de chacune espece, ils ne manquent point quand il faut d’aller au petit poisson, qu’ils appellent Auhaitsiq, et en peschent vne infinité auec leur ceine, et cette pesche du petit poisson318||se faict en commun, puis le partagent par grandes escuellées, duquel nous auions nostre part, comme bourgeois et habitans du lieu. Ils peschent et prennent aussi de plusieurs autres especes de poissons, mais comme ils nous sont incogneus et qu’il ne s’en trouue point de pareils en nos riuieres, ie n’en fais point aussi de mention.
Estant arriué au lieu nommé par les Hurons Onthrandéen, et par nous le Cap de Victoire ou de Massacre, au temps de la traite où diuerses Nations de Sauuages s’estoient assemblez, ie vis en la Cabane d’vn Montagnais vn certain poisson qu’ils appellent Chaousarou, gros comme vn grand Brochet, il n’estoit
