Qui rende au jour ta glace legitime ?
Je n’en sçay rien : j’ay tout veu, tout cherché,
Brin après brin je me suis espluché ;
J’ay pris le seing, j’ay pris la patience
D’examiner ma propre conscience,
Et quelquesfois plus cruel et plus chaud
Qu’un lestrigon, qu’un tigre, qu’un brachaud,
J’ay fait souffrir torture sur torture
À l’innocente et pauvre creature,
Sans que jamais mon cœur ait pû sçavoir
Rien qui blessast ta gloire et mon devoir.
Dy-le-moy donc, au moins fay que je sache
Si par malheur j’ay honny d’une tache
Le beau minois du service eternel
À toy promis sous maint vœu solennel ;
Escry-le-moy, ne laisse plus en peine
Un franc esprit qui t’accuse de haine ;
Je dy de hayne, ayant quelque soupçon
Qu’il y va plus que d’un simple glaçon :
Car autrement, seroit-il bien possible
Que ta vertu, si prompte et si sensible
Aux saints respects qu’on doit à l’amitié,
Eust consenty, trahissent ta pitié,
À me priver de l’honneur de ta veue,
Sans qui la mienne est presque despourveue
De ce plaisir nompareil et divin
Qu’elle goustoit au pur esclat du vin ?
Fay-moy citer pour ouyr des reproches ;
Assembles-y tes parens les plus proches
Appelles-y, qui vaut bien des parens,
Nostre effectif, nostre cher Sainct-Laurens ;
Et si tu veux, pour augmenter ma honte,
Fay que ses sœurs, dont je fay tant de conte,
Avec leur niece au front si plein d’attraits,
Aux yeux si beaux, soient presentes aux traits,
Page:Saint-Amant - Œuvres complètes, Livet, 1855, volume 1.djvu/432
Apparence
Le texte de cette page a été corrigé et est conforme au fac-similé.