Mandane n’alloit meſme plus ſe promener ſur le haut de la Tour, comme elle avoit accouſtumé : de ſorte que quand il fuſt allé à Sardis, comme il en avoit envie, il n’auroit pu voir que les Murailles dans leſquelles elle eſtoit enfermée. Ce Prince eut pourtant beaucoup de peine à s’en empeſcher : & je ne sçay s’il l’auroit pû, ſi ſes Amis qui aprehendoient qu’il n’y allaſt, ne fuſſent devenus ſes Gardes en l’obſervant ſi ſoigneusement, qu’il ne fut pas Maiſtre de ſes actions pendant tout ce temps là. Ce n eſt pas qu’ils craigniſſent que Creſus vouluſt violer la foy publique : mais ils aprehenderent la rencontre de Mazare & celle du Roy de Pont, & qu’il ne ſe fiſt un combat particulier entre eux, qui pourroit cauſer un deſordre general. Cependant Abradate, en attendant que Creſus euſt bien reſolu ce qu’il vouloit propoſer, envoya demander à Cyrus la permiſſion de voir Panthée, en preſence de qui il luy plairoit : afin qu’il ne pûſt pas croire que ce fuſt pour luy parler des affaires de la Guerre, & sçavoir par elle les nouvelles de ſon Camp. Cyrus, qui sçavoit par ſon experience, combien il eſt doux de voir ce que l’on aime, & qui eſpera meſme d’abord, que peut-eſtre Abradate luy pourroit il faire recevoir la ſatisfaction de voir Mandane, luy accorda de bonne grace ce qu’il demandoit : ſi bien que donnant ordre à cette entreveüe, qui ſe fit le meſme jour, Abradate fat conduit à Cyrus, qui le reçeut avec une civilité extréme : en ſuitte dequoy il le conduiſit luy meſme à la petite Ville où eſtoit Panthée, qu’il voulut ſurprendre agreablement. Il le mena donc dans la Chambre de cette Princeſſe, avec laquelle Cleoniſe, Doraliſe, & Pherenice eſtoient alors : mais
