le Roy d’Aſſirie, en prenant cette Eſpée aſſez civilement) que nous la puſſions delivrer, cette admirable Princeſſe qui nous a rendus vous & moy ſi criminels & ſi malheureux. Apres cela faiſant un grand effort ſur luy meſme, il ſurmonta une partie de ſa colere & de ſa fierté : & apres avoir remercié Andramite qu’il reconnut fort bien, pour eſtre celuy qui avoit eſcorté les Princeſſes, & qui l’avoi amené à Sardis, il ſe laiſſa conduire à Mazare & à luy : ou pour mieux dire, nous nous laiſſasmes mener à Tegée & au Capitainé qui avoit gardé ces Priſonniers : qui par un Eſcalier dérobé, nous fit ſortir ſi ſecrettement, que les Soldats qui n’eſtoient pas gagnez, ne s’en aperçeurent point. Cela eſtant fait, nous ne trouvaſmes plus de difficulté à rien : parce qu’Andramite qui eſtoit un des Lieutenans Generaux de l’Armée de Creſus, avoit fait en ſorte qu’un Capitaine qui eſtoit ſa Creature, eſtoit en garde à une Porte de la Ville, qui regardoit vers le Quartier d’Abradate où nous voulions aller, & où nous guſmes en effet, ſans rencontrer aucun obſtacle. Nous n’y fuſmes pas ſi toſt, qu’allant droit à la Tente d’Abradate, nous aviſasmes ce que nous avions à faire, & il fut reſolu Seigneur (pourſuivit Orſane, adreſſant la parole à Cyrus) que pour ne rien hazarder, ces Princes n’entreprendroient pas encore de ſe venir jetter dans voſtre Camp, parce que le jour commençoit de paroiſtre : & qu’un Frere d’Andramite qui commande les gens de guerre qui tiennent le paſſage de la Riviere d’Helle, n’aurait pas le temps de diſposer les choſes à nous laiſſer paſſer ſi promptement. Joint que comme Abradate à ſon Quartier à un Poſte fort avantageux, il ne craignit pas que Creſus entrepriſt de le forcer en ce lieu là : de plus, il creût bien encore qu’il ne reviendroit pas ſi toſt de l’eſtonnement
