ils euſſent oublié le paſſé.. Le Roy d’Aſſirie s’eſchapoit pourtant touſjours de temps en temps, à dire quelque choſe qui faiſoit aiſément voir qu’il s’en ſouvenoit, & que meſme il ne l’oublieroit jamais : touteſfois cela n’avoit point de ſuitte : & la ſageſſe de Mazare temperoit ſi à propos 1 humeur impetueuſe du Roy d’Aſſirie, qu’il n’en arrivoit point de deſordre entre eux Ils en vinrent meſme aux termes, de parler tous trois enſemble de leur amour, & d’en parler ſans ſe quereller : il eſt vray que ce fut en la preſence d’Abradate : car on aportoit un ſoin extréme à ne les laiſſer jamais ſeuls, de peur qu’une paſſion auſſi violente que celle qu’ils avoient dans l’ame, ne produiſiſt enfin quelque funeſte evenement.
Cependant Beleſis au milieu d’une Armée de cent cinquante mille hommes, & dans une Ville où il y avoit deux Grandes Princeſſes, & grand nombre d’autreſſ Dames de qualité, tant de celles que l’on avoit fait Priſonnieres, que de celles de la Ville meſme ; ne voyoit perſonne que le Prince Mazare, avec qui il eſtoit logé, tant la melancolie l’accabloit. Les choſes eſtant donc en ces termes, un jour que Cyrus & Maxare eſtoient chez la Reine de la Suſiane, chez qui eſtoit auſſi la Princeſſe Araminte ; Beleſis eſtant allé juſques dans cette petite Ville aveque le Prince des Saces, afin de faire racommoder quelque choſe à la Boiſte d’un Portrait qui luy eſtoit infiniment cher, & qu’il ne vouloit confier à perſonne : comme il parloit à celuy qui y devoit travailler, & qu’il en oſtoit la Peinture, qu’il ne vouloit pas abandonner : cét Ouvrier qui ſe connoiſſoit en cét Art, la trouvant merveilleuſe, ne pouvoit ſe laſſer de la regarder. Pendant qu’il la conſideroit de cette ſorte, avec autant d’admiration que de plaiſir ; un Eſtranger
