beauté à faire beaucoup de conqueſtes : car aſſurément mon regne n’euſt pas eſté doux. l’en connois pourtant, reprit Beleſis, qui vivent ſous voſtre puiſſance, qui n’ont pas deſſein de ſe rebeller : ſi ce que vous dittes eſt vray, reprit elle, c’eſt que je ne sçay pas qu’ils ſoient mes Sujets : car ſi je le sçavois j’en ferois bien toſt des Eſclaves : & des Eſclaves encore ſi chargez de la peſanteur de leurs fers, qu’ils ſeroient peut-eſtre contraints d’eſſayer de les rompre. Cleodore dit cela par un certain emportement d’eſprit qui eſtonna Beleſis, & qui luy oſta la hardieſſe de ſe declarer, comme il en avoit eu l’intention : parce qu’il creût que Cleodore parloit ainſi, avec deſſein de luy faire entendre qu’il ne devoit pas s’engager à la ſervir. En effet cette penſée s’empara ſi fort de ſon eſprit, que depuis ce jour la il devint aſſez reſveur, & aſſez melancolique : & juſques au point, qu’il ne s’informa plus de rien : de ſorte qu’au lieu qu’il avoit accouſtumé de fournir de nouvelles à Cleodore, & de luy aprendre tout ce qui ſe paſſoit, devant que tout le monde le sçeuſt, c’eſtoit à Cleodore à luy aprendre tout, car il ne sçavoit pas ſeulement les choſes les plus publiques. Cette aimable Fille s’eſtant donc aperçeuë de ce changement, ſe mit un jour qu’il eſtoit ſeul avec elle à luy en faire la guerre, & à la luy faire obligeamment : car par bonheur pour luy, elle eſtoit en un de ces jours où ſa fierté eſtoit ſi cachée, qu’on ne la deſcouvroit point. Eſt il poſſible, luy dit elle, que je voye ce que je voy ? car enfin vous ne m’eſpouventez guere moins aujourd’huy de ne sçavoir point ce que l’on fait dans Suſe, que vous m’eſpouventaſtes lors que vous y veniez d’arriver, & que vous sçaviez pourtant toutes choſes. Eſt-ce que vous eſtes deſja las d’eſtre complaiſant
