doute, reſpondit elle, car j’aurois tant d’horreur pour tous les hommes, que je ne pourrois pas manquer d’en avoir pour vous. La vangeance, reprit il, ſeroit pourtant une douce choſe : je l’advoüe, repliqua Clodore, mais il ne faut pourtant jamais ſe vanger ſur ſoy meſme, en ſe voulant vanger d’autruy. Et puis Hermogene, adjouſta t’elle, vous avez trop de bonnes qualitez, pour devoir l’affection qu’on auroit pour vous, à la haine que l’on auroit pour voſtre Rival : c’eſt pourquoy il vaut mieux que vous alliez chercher quelque meilleure fortune. Non non Madame, reprit il, je ne ſuis pas de ces gens delicats & difficiles, qui veulent que l’on ſonge exactement de quelle main on leur offre des preſens : car pourveû que vous m’aimiez, je ne ſongeray point ſi ce ſera par vangeance ou par inclination. Apres tout Hermogene, interrompit Cleodore, je veux eſtre obeïe : encore eſt ce quelque grace que vous me faites, reprit il, de me commander abſolument, apres avoir commencé de me prier. Il eſt vray, dit elle, mais pour faire que je ne me repente pas de vous l’avoir accordée, faites donc preciſément ce que je veux. Hermogene voyant avec quelle fermeté Cleodore luy parloit, creut qu’il ne faloit pas luy reſiſter abſolument : de ſorte que pour gagner temps, afin d’executer un deſſein qu’il avoit, il la conjura de luy vouloir accorder ſix jours ſeulement : à la fin deſquels il luy demandoit une heure d’audience. Comme Cleodore eſtimoit fort Hermogene, elle luy accorda ce qu’il vouloit, & ils ſe ſe parerent de cette ſorte : Cleodore eſperant que dés qu’elle auroit banny Hermogene, Beleſis reviendroit à elle ; & Hermogene eſperant auſſi, que des qu’il auroit obtenu de Beleſis une choſe qu’il luy vouloit demander, il ſeroit
