t’il, ce ne ſera pas aſſez que de haïr Beleſis, ſi vous n’aimez encore un peu Hermogene : je vous aſſure, luy dit elle, que ſi ce que vous dittes eſt vray, il ne ſera pas aiſé que j’aime jamais rien : & j’auray meſme tant de haine pour moy, que je ne ſeray pas en eſtat d’aimer les autres, puis qu’à parler ſincerement, on n’aime gueres que pour l’amour de ſoy : mais du moins vous puis-je aſſurer, que je vous ſeray eternellement obligée, de m’avoir deſcouvert la perfidie de Beleſis. Comme elle achevoit de prononcer ces paroles, Beleſis entra, qui voyant Hermogene & Cleodore ſeparez de la Compagnie, fut droit à eux pour interrompre leur converſation. quoy que Leoniſe fuſt dans la meſme Chambre. En y allant, il penſa pourtant s’arreſter & changer d’avis : parce qu’il craignoit qu’Hermogene n’euſt deſcouvert ſon crime à Cleodore : neantmoins comme il avoit deſja fait quelque pas, vers l’endroit où ils eſtoient, il continua d’y aller, avec une eſmotion ſur le viſage, qui fit bien connoiſtre à Cleodore qu’il n’avoit pas l’eſprit tranquile. D’autre part, cette belle Fille n’eut pas peu de peine à ſe contraindre, & à déguiſer ſes ſentimens : Mais comme il le faloit, afin des s’eſclaircir de ce qu’elle vouloit sçavoir, elle ſe fit une violence eſtrange, pour parler à Beleſis comme elle avoit accouſtumé. Elle le reçeut touteſfois avec une civilité contrainte, qui embarraſſa fort Beleſis : ne sçachant ſi c’eſtoit un effet de la connoiſſance qu’elle avoit de ſon crime, on ſi c’eſtoit que pour luy faire dépit elle le vouloit traitter ainſi. Hermogene eſtoit auſſi tellement interdit, qu’il n’oſoit regarder Beleſis : c’eſt pourquoy il n’eſt pas eſtrange ſi ces trois Perſonnes ne purent durer ſeules enſemble : & ſi elles ſe raprocherent
