pour Hermogene : en attendant que ſa grande vangeance eſclataſt tout d’un coup. La choſe prit meſme un ſi mauvais biais, que deux ou trois ſois Beleſis & Hermogene penſerent ſe quereller : & ſi je ne m’y fuſſe trouvé un jour, il en ſeroit ſans doute arrivé quelque malheur. Mais ce qui nuiſit à Beleſis, ſervit beaucoup à avancer le deſſein d’Hermogene : car Cleodore jugeant combien Beleſis ſeroit irrité, ſi elle eſpouſoit Hermogene, puis qu’il l’eſtoit tant de la civilité qu’elle avoit pour luy ſouffrir en effet qu’il la fiſt demander ſecrettement à ſes Parens : afin que le mariage de Leoniſe & le ſien ſe publiaſſent en meſme temps : imaginant un plaiſir extréme à l’accabler de tant de choſes fâcheuſes à la fois. Et en effet, on les trama ſi ſecrettement, & on les avança de telle ſorte en peu de jours, que tous les Parens eſtant d’accord, & la choſe paroiſſant indubitable, Tiſias & Hermogene furent un peu plus favoriſez : de ſorte qu’Hermogene ayant trouvé un jour le Portrait que Cleodore avoit donné à Beleſis, & qu’elle luy avoit oſté ; il le prit, & elle le luy laiſſa : car pour celuy de Leoniſe, elle l’avoit oſté de la Boiſte, & le luy avoit rendu. Ainſi Hermogene fut enrichy des pertes de ſon Amy : ce n’eſt pas que Cleodore aimaſt Hermogene ; mais la vangeance occupoit ſi fort ſon eſprit, qu’elle ne faiſoit reflexion qu’à ce qui la pouvoit haſter. Pendant que toutes ces choſes ſe paſſoient, Beleſis menoit la plus malheureuſe vie du monde : car ſon ame eſtoit en telle aſſiette, qu’il ne penſoit guere moins à Cleodore qu’à Leoniſe, & qu’il haïſſoit autant Hermogene que Tiſias. Au commencement, ſes deſirs eſtoient pourtant differens pour ces deux belles Perſonnes : car il ſouhaitoit poſſeder Leoniſe, & deſiroit ſeulement qu’Hermogene ne poſſedaſt
