inclinations. Mais ſi Voſtre Alteſſe a eu pour Anceſtres des Rois & des Heros, & ſi elle à pour Freres des Heros dignes d’eſtre Rois ; elle a encore pour Mary un Prince ſi illuſtre par ſa Condition, & ſi conſiderable par ſes rares qualitez, que ſoit que l’on vous regarde comme Fille, comme Sœur, ou comme Femme, l’on vous voit touſjours, comme je l’ay dit, toute couverte de ſplendeur, de rayons, & de lumiere. En effect, ce Grand Prince qui conte parmy ſes Devanciers le Reſtaurateur de l’Eſtat, ſeroit capable de l’eſtre luy meſme, veû les grandes choſes qu’il a faites ; & l’invincible Comte de Dunois ne fit rien qu’il ne peuſt faire par ſon courage & par ſon eſprit. Mais Madame, je n’oſerois toucher davantage, à une Matiere ſi precieuſe, ce ſeroit
