valeur de Cleandre le ſurprit & le mit en deſordre. D’abord il fut bleſſé en deux endroits, ſans avoir pû toucher Cleandre : qui apres luy avoir encore fait deux autres bleſſures, paſſa ſur luy ; le jetta à terre ; luy oſta ſon Eſpée ; & apres l’avoir deſarmé : N’avoüerez-vous pas, luy dit-il, qu’il y a lieu de croire que ma naiſſance n’eſt pas inferieure à la voſtre ? & ne direz-vous pas du moins, que s’il y a de la difference entre nous, ce n’eſt que la Fortune qui la fait ? Arteſilas eſtoit ſi bleſſé, & ſi honteux de ſa deffaite, qu’il n’eut pas la force de répondre, joint qu’en meſme temps des femmes de chez la Princeſſe de Claſomene qui eſtoient à des feneſtres, & qui avoient crié dés le commencement de ce combat qu’elles avoient veu ; avoient enfin envoyé des gens pour les ſeparer. Mais ils n’arriverent que comme c’eſtoit deſja fait, l’Eſcuyer de Cleandre ayant auſſi bleſſé celuy d’Arteſilas, de qui l’Eſpée eſtoit rompuë. Abradate arriva encore, qui fit porter le Prince Arteſilas chez luy, & qui mena Cleandre à ſon logis, ne voulant pas qu’il allaſt au ſien, qu’il n’euſt sçeu la cauſe de ce combat, & comment le Roy en recevroit la nouvelle. Comme Creſus aimoit fort Cleandre, & qu’il n’aimoit guere Arteſilas, on n’eut point de peine à luy perſuader que ce Prince avoit eſté l’agreſſeur : de ſorte qu’il témoigna eſtre fort irrité contre luy, de ce qu’il avoit voulu outrager une perſonne qui luy eſtoit ſi chere. Les Amis d’Arteſilas adoucirent pourtant la choſe : & dirent au Roy que les réponſes que Cleandre luy avoit faites l’avoient aigri : & comme pas un de ces deux Rivaux ne nomma la Princeſſe, cette querelle paſſa pour n’avoir point en d’autre fondement, que quelques paroles piquantes qu’Arteſilas avoit