à la Princeſſe Elſimene, par cette nouvelle marque d’amour, qu’elle recevoit d’un Prince qu’elle aimoit ſi cherement. Il eut meſme cette complaiſance pour elle, de vouloir que ces Vers fuſſent en Grec : parce que cette Princeſſe aprenoit alors cette Langue, qui eſt fort en uſage parmy toutes les Dames de qualité d’Apamée, qui ont quelque reputation d’eſprit. Cependant le Roy de Phrigie mourut : & le Prince Artamas comme eſtant aiſné du Prince Tydée & du Prince Adraſte, monta au Throſne, & ſe vit enfin en eſtat de couronner bien-toſt Elſimene. Auſſi dés que les Funerailles du feu Roy furent faites, il publia ſon Mariage : et. Fit faire des preparatifs magnifiques pour recevoir cette Princeſſe à Apamée ; pour la faire reconnoiſtre comme Reine de tous ſes Peuples ; & pour vous declarer par conſequent, pour ſon legitime & unique ſuccesseur. Cette grande Feſte eſtoit ſi proche, que l’on avoit deſja mené à la Reine le ſuperbe Chariot dans lequel elle devoit faire ſon Entrée : & je luy avois meſme fait porter juſques à un Carreau de Drap d’or, ſur lequel vous deviez eſtre aſſis, aux pieds de la Reine voſtre Mere, le jour de cette grande ceremonie. Mais, Seigneur, elle fut bien troublée : car deux jours auparavant qu’elle ſe deuſt faire, comme toutes choſes eſtoient preſtes pour cette ſuperbe Entrée : & que le Roy voſtre Pere avoit une joye que l’on ne sçauroit exprimer : eſtant allé de ſa part vers cette Princeſſe, pour luy teſmoigner tout de nouveau la ſatisfaction qu’il avoit, de luy pouvoir bien toſt donner la derniere marque d’amour qu’il luy pouvoit rendre : & pour l’aſſurer que le jour ſuivant, il luy envoyeroit des Gardes : je rencontray