quelque choſe de plus precieux : mais que pour Mandane, cela ne ſe peut abſolument. Au reſte, luy dit-il, le party de Creſus n’eſt pas ſi foible que vous penſez : celuy du Roy d’Aſſirie, interrompit Araminte, eſtoit bien puiſſant : & il n’a pas laiſſé d’eſtre détruit. Celuy de Creſus eſt plus fort, reprit-il, car il eſt plus uny : & comme il s’agit d’empeſcher Cyrus d’eſtre Maiſtre de toute l’Aſie, nos Soldats combattant pour la Patrie & pour la liberté, ne ſeront gueres moins animez que moy, qui combatray pour Mandane. La Princeſſe Araminte voyant qu’elle ne pouvoit rien gagner ſur l’eſprit du Roy ſon Frere ; ne pût s’empeſcher de répandre quelques larmes, & de joindre les prieres aux raiſons : mais les unes & les autres furent inutiles ; & elle fut contrainte de ſe ſeparer de ce Prince, ſans en avoir pû rien obtenir. Elle voyoit bien qu’en effet il avoit quel que confuſion, d’eſtre injuſte & ingrat envers Cyrus, à qui il devoit tant de choſes, & pour qui il avoit tant d’eſtime : l’amour touteſfois eſtoit plus ſorte que la raiſon dans ſon ame, qui n’eſtoit plus ſensible qu’à cette ſeule paſſion. Les Sacrificateurs de ce Temple preſenterent une magnifique colation à la Princeſſe Araminte, car cette entre-veuë s’eſtoit faite apres diſner : mais elle la vit & la loüa ſans vouloir manger, tant elle eſtoit affligée : & elle repartit de là, pour aller coucher à un Chaſteau qui n’en eſtoit qu’à cinquante ſtades. La ſeparation du Roy de Pont & d’elle fut fort tendre : car cette Princeſſe s’imaginant qu’elle ne reverroit peut-eſtre jamais le Roy ſon frere, ou que ſi elle le revoyoit, elle le verroit peut-eſtre vaincu & priſonnier, ne pût retenir ſes larmes. Heſionide qui entroit dans tous ſes ſentimens, pleuroit auſſi bien qu’elle : & le Roy