Roy, ayant une impatience eſtrange de revoir cette belle Perſonne, il fut à un Temple, où il avoit sçeu par Menaſte qu’elle alloit d’ordinaire ? touteſfois Ameſtris n’y fut point ce jour là, n’oſant pas ſe fier aſſez à elle meſme, pour vouloir que la premiere entre-veuë d’Aglatidas & d’elle, ſe fiſt devant tant de monde : n’ignorant pas, que veû les choſes paſſées, on l’obſerveroit eſtrangement. Si bien qu’Aglatidas eſtant trompé de l’eſperance qu’il avoit euë, au lieu d’y voir Ameſtris y vit Anatiſe : qui y avoit eſté exprés, afin de sçavoir ſi Ameſtris & Aglatidas ſe trouveroient en ce lieu là. Cette rencontre luy donna de la confuſion : sçachant bien qu’en quelque ſorte il avoit offencé cette perſonne : mais comme ſa veuë luy avoit eſté funeſte la derniere fois, puis qu’elle avoit eſté cauſe de la jalouſie d’Ameſtris, & de la bizarre reſolution qu’elle avoit priſe en ſuitte ; il ſortit de ce Temple, faiſant ſemblant de ne l’avoir pas connuë, ce qui la penſa deſesperer. Cependant l’heure où il devoit aller chez Ameſtris eſtant arrivée, il y fut : mais avec un battement de cœur eſtrange. Comme le deüil des Veuſves n’eſt que de quarante jours a Ecbatane, Ameſtris ne le portoit deſja plus quand nous y arrivaſmes. neantmoins quoy qu’elle euſt bien voulu n’eſtre pas negligée en renvoyant Aglatidas ; elle ne voulut touteſfois pas ſe parer en cette rencontre : & elle prit un milieu entre les deux, où ſans dérober rien à ſa beauté, elle eſtoit pourtant avec autant de modeſtie en ſon habillement, qu’elle en avoit dans l’humeur. Menaſte eſtoit ſeule auprès d’elle, lors qu’Aglatidas & moy y fuſmes : car elle avoit voulu que j’y fuſſe, de peur qu’Ameſtris ne la grondaſt, ſi elle aprenoit qu’elle luy euſt conſeillé d’y aller ſans