elle : il monta à ſa Chambre, & la trouva ſans autre compagnie que celle de ſes Femmes. D’abord qu’elle le vit, elle en fut ſurprise : neantmoins s’imaginant qu’il viendroit bien toſt du monde, & que du moins Tharpis ne luy manqueroit pas, & ne ſeroit pas long temps à la delivrer de la perſecution de Megabiſe : elle ſe reſolut, pour gagner ce peu de temps qu’elle croyoit devoir eſtre fort court, de parler preſques touſjours ; afin d’oſter à Megabiſe le moyen de luy rien dire qui l’importunaſt. Elle creût meſme qu’il faloit agir comme ſi elle euſt perdu la memoire de toutes les choſes paſſées : & qu’elle ne ſe fuſt point du tout ſouvenuë qu’il avoit eſté amoureux d’elle. Si bien que dés qu’il fut aſſis, prenant la parole, & croyant ne pouvoir trouver un plus ample ſujet pour faire une longue converſation, que de luy parler de vous : puis que nous ſommes en liberté, luy dit elle, dites moy un peu, je vous prie, s’il eſt vray que Cyrus ſoit effectivement tel que la Renommée me l’a dépeint. Je ne vous demande pas, pourſuivit elle, que vous me faciez le recit de toutes ſes conqueſtes : mais je veux que vous me diſiez ſans déguiſement, s’il eſt vray qu’il poſſede toutes les vertus, & qu’il n’ait pas un défaut : car comme je n’eſtois pas à Ecbatane lors qu’il y paſſa, je ne le vy point : & je voudrois bien sçavoir, ſi tous ceux à qui j’en entens parler ne le flatent pas. Ce Prince eſt ſi accomply en toutes choſes, repliqua Megabiſe, qu’on ne le sçauroit flater, non plus que voſtre beauté, quelques loüanges qu’on luy donne : Mais Madame, luy dit-il, ſi Aglatidas ne vous l’a pas dépeint tel qu’il eſt, il n’eſt pas aſſez reconnoiſſant des graces qu’on luy fait : & vous devez craindre, ce me ſemble,