d’honneur, elle ne pourroit plus l’eſpouser apres cela : ou que ſi elle l’eſpousoit, j’aurois la ſatisfaction de voir toutes ces jalouſies, que l’on vous a reprochées avec tant d’injuſtice, eſtre pleinement juſtifiées je vous laiſſe à penſer combien Otane careſſa Dinocrate : & s’il ne luy promit pas de le recompenſer d’une choſe, dont il avoit deſja eſté ſi bien payé par Tharpis. Cependant il ſceut encore par luy, qu’Ameſtris avoit veu Aglatidas chez Menaſte : ſi bien qu’auparavant que de ſe monſtrer à aucun des ſiens, Otane voulut encore obſerver durant quelques jours, ſi effectivement Ameſtris avoit rompu avec Aglatidas, ou ſi ce n’eſtoit qu’une feinte ; deffendant expreſſément à Dinocrate de dire à qui que ce ſoit qu’il fuſt vivant. Et en effet il luy obeït, & n’en parla pas meſme à Anatiſe ny à Tharpis ; ne voulant pas donner une ſi mauvaiſe nouvelle à ce dernier, qui l’avoit ſi bien recompenſé d’un ſervice qui luy devenoit inutile par le retour d’Otane. Mais enfin Dinocrate ayant eſté apprendre à ſon Maiſtre qu’Ameſtris & Menaſte s’en alloient aux champs, & qu’Aglatidas devoit auſſi partir ; Otane creut que c’eſtoit une choſe concertée, & qu’ils ſe marieroient peut-eſtre en ſecret : de ſorte que ſe preparant auſſi-toſt à partir auſſi bien qu’Aglatidas, il fut l’attendre à un Bois par où il croyoit qu’il devoit paſſer ; avec intention toutefois de ne l’attaquer pas en chemin, de le ſuivre de loing ; & de ne ſe monſtrer que lors qu’il ſeroit arrivé aupres d’Ameſtris. Mais comme Aglatidas eſtoit ſorty par une autre porte, & qu’il n’avoit pris le chemin du lieu où eſtoit Ameſtris, qu’eſtant deſja aſſez nuancé dans un autre, Otane attendit inutilement : & meſme ſi long temps, qu’à la fin s’impatientant, &