pour aller voir ſon perſecuteur ; s’imaginant qu’il pourroit en quelque façon l’adoucir. Mais il ſe trompa bien : car comme Otane avoit ſceu non ſeulement qu’Aglatidas avoit penſé eſpouser la Femme, mais encore que Megabiſe, Tharpis, & Artemon, en avoient eſté amoureux ; il le reçeut ſi mal, que s’il n’euſt eſté accouſtumé à ſouffrir beaucoup de choſes faſcheuses de luy, ils ſe ſeroient querellez. Bien eſt il vray qu’ils n’en euſſent pas eu le loiſir : car à peine Artemon fut il arrivé, que le Lieutenant des Gardes de Ciaxare arriva auſſi avec cent de ſes Compagnons : de ſorte qu’Otane ne ſe trouva pas peu embarraſſé, sçachant quel eſtoit ſon crime, & voyant qu’il eſtoit trop foible pour pouvoir reſister à un ſi grand nombre d’ennemis. Dinocrate, qui eſtoit allé luy chercher des Soldats, n’eſtoit pas encore revenu. ſi bien que n’ayant que tres peu de gens en ce lieu là, & des gens encore qui ne luy eſtoient pas fort affectionnez, il ne sçavoit quelle reſolution prendre. Il euſt bien voulu s’enfuir, & peut eſtre meſme poignarder Ameſtris : mais aprenant que ce Lieutenant des Gardes s’eſtoit ſaisi de toutes les advenuës, il parut eſtre ſi furieux & ſi enragé, qu’Artemon creut, à ce qu’il m’a dit depuis, qu’il ſe tuëroit de ſa propre main. Cependant celuy qui, demandoit à entrer, voyant qu’on ne luy reſpondoit pas preciſément, fit enfoncer la porte & entra, ſuivy d’une partie des ſiens : Otane entendant ce bruit, fut droit à ce Lieutenant l’Eſpée à la main : & Artemon tirant auſſi la ſienne, & voyant qu’Otane n’eſtoit pas en eſtat de ſe deffendre ; ſe mit entre luy & ce Lieutenant des Gardes : luy diſant qu’il pardonnaſt à un furieux. Mais Otane pour prouver qu’il ne mentoit pas, & qu’il l’eſtoit en effet ; voyant qu’il ne pouvoit joindre