Lettres ſe ſeroit trompé, & auroit donné une Lettre pour l’autre ; elle en eut un ſensible deſpit. Neantmoins comme elle eſt hardie & artificieuſe, ce premier ſentiment eſtant paſſé, elle ſe mit à rire & demandant à voir cette Lettre, afin de la pouvoir retirer des mains de Cleonice ; elle luy dit qu’elle l’eſcrivoit à un de ſes parens qui s’en alloit aux champs, & qui n’eſtoit pas bien avec ſa Mere : Mais Cleonice qui ne la luy vouloit pas rendre, luy dit qu’elle l’avoit laiſſée chez elle. Cependant comme Artelinde sçavoit qu’elle en avoit eſcrit pluſieurs autres, où le meſme malheur pourroit eſtre arrivé, elle avoit l’eſprit bien en peine : elle n’oſa touteſfois retourner ſur ſes pas, & ne venir pas au Temple avec que nous, de ſorte que nous y fuſmes enſemble eſperant auſſi que peut-eſtre celuy à qui elle y avoit donné aſſignation, auroit reçeu la veritable Lettre qui eſtoit pour luy, & s’y trouveroit. Mais ne l’y voyant pas, elle ne douta plus que le deſordre de ſes Lettres ne fuſt univerſel : ſi bien que l’impatience la prenant dés qu’elle y eut un peu eſté ; elle nous quitta, & s’en retourna chez elle, où elle trouva toutes les reſponses de ſes Amants, qui la confirmerent dans l’opinion qu’elle avoit euë. Celuy qui devoit partir à midy, & qui avoit reçeu l’aſſignation du ſoir au bord de la mer, ſe plaignoit de la cruelle raillerie qu’elle luy avoit faite & ſembloit partir d’Epheſe l’eſprit fort irrité contre elle. Celuy qui n’entroit jamais dans les Temples, & qui avoit reçeu la Lettre qui ordonnoit à celuy à qui elle eſtoit eſcrite effectivement de ſe trouver au Temple de Diane, luy diſoit que c’eſtoit trop vouloir exiger de luy, que de vouloir qu’il l’aimaſt juſques à changer de Religion ; & que c’eſtoit bien aſſez qu’il adoraſt ſes yeux ; ſans le vouloir forcer à faire une prophanation qui les deſhonnoreroit dans ſon païs ſi on l’