croire, que par des moyens qu’il ne comprenoit pas, il ſeroit quelque jour plus heureux, qu’il n’eſtoit alors infortuné. Auſſi n’eſtoit-il jamais ſans l’avoir ſur luy : ce n’eſt pas qu’il ne l’euſt dans ſa memoire, mais il luy ſembloit, tant l’amour fait faire de petites choſes inutiles aux plus Grands hommes du monde, que ce n’eſtoit pas encore aſſez : ſi bien qu’il le portoit touſjours eſcrit dans des Tablettes de Cedre. Voila donc comment raiſonnoient ces deux Grands Princes & ces deux illuſtres Amants, pendant le voyage d’Artamas : qui trouva beaucoup plus de difficulté qu’il n’avoit penſé, à perſuader le gouverneur du Chaſteau d’Hermes : car il n’avoit pas preveu que Ligdamis n’y ſeroit point. Il le reçeut pourtant fort civilement, & comme celuy par la faveur duquel il commandoit dans la Place ou il eſtoit : mais s’agiſſant de donner paf ſage à des Troupes Eſtrangeres, il avoit bien de la peine à s’y reſoudre : quoy que le Prince Artamas luy diſt que ce n’eſtoit que pour delivrer une Princeſſe, qui eſtoit la principale cauſe de la guerre : & pour delivrer auſſi la Fille de ſon Roy, que l’on perſecutoit avec beaucoup d’injuſtice. Bien eſt-il vray, qu’il avoit l’eſprit ſi inquiet, de n’avoir point de nouvelles de ſon Fils, qu’il luy dit eſtre allé eſcorter une Sœur qu’il avoit & quelques autres Dames : qu’il luy advoüa qu’il ne luy eſtoit pas poſſible de luy reſpondre preciſément, qu’il ne sçeuſt ce qu’il eſtoit devenu. Mais lors que par le retour de quelques cavaliers, il aprit une heure apres que Ligdamis eſtoit priſonnier, & que la Fille eſtoit auſſi captive ; il en eut une douleur que l’on ne sçauroit exprimer. Le Prince Artamas ayant sçeu la choſe, luy