Cyrus eſtant arrivé au Camp, eut envie d’envoyer dire à la Princeſſe Araminte, une partie de ce qu’il avoit sçeu de Spitridate : luy deſguisant un peu l’autre, & le faiſant encore moins bleſſé qu’il ne l’avoit eſté en effet : Mais comme ce recit avoit eſté fait devant pluſieurs Perſonnes, il ne jugea pas qu’il fuſt aiſé de le pouvoir. Neantmoins croyant qu’elle auroit encore plus de conſolation de sçavoir que Spitridate eſtoit bleſſé, & qu’il l’aimoit touſjours, que de le croire mort ou infidelle, comme elle faiſoit quelqueſfois : il envoya enfin Feraulas pour luy aprendre qu’il y avoit environ un mois qu’un Eſtranger qui eſtoit arrivé au Camp, avoit rencontré Spitridate : car Anaxaris avoit dit qu’il y avoit juſtement ce temps là qu’il avoit ſecouru ce Prince, Feraulas obeïſſant à ſon maiſtre fut auſſi-toſt trouver Araminte : qui d’abord eut une joye extréme, de sçavoir que l’on avoit veu Spitridate. Mais ne ſe contentant pas de ce que Feraulas luy diſoit, & voulant elle meſme voir celuy qui l’avoit veu ; comme elle remarqua qu’il ne luy accordoit pas poſitivement ce qu’elle vouloit, elle s’imagina des choſes ſi funeſtes de Spitridate, que Feraulas luy promit de ſuplier Cyrus de ſa part, de luy faire voir celuy qui avoit aporté cette nouvelle : & en effet eſtant retourné au Camp, & s’eſtant aquité de ſa commiſſion, Cyrus pria Anaxaris le lendemain de vouloir faire une viſite à l’illuſtre Princeſſe Araminte, de qui le Prince Spitridate ſe pleignoit avec tant d’injuſtice : le conjurant touteſfois, de vouloir le faire un peu moins bleſſé qu’il ne l’avoit eſté effectivement. La precaution de Cyrus fut neantmoins inutile : car comme Phraarte eſtoit bien aiſe qu’elle creuſt