la perte de Mandane ſi elle m’arrive. Ainſi, ſuperbe Thomiris, à qui les Dieux promettent ma teſte ; ſi Mandane devient infidelle, vous ne triompherez point de moy : car je ſuis ſi aſſuré de mourir de la douleur que me donnera ton inconſtance, que je ne sçaurois craindre de perir pas vos mains. Apres cela, Cyrus voulant commencer de mettre en pratique la courageuſe reſolution qu’il avoit priſe, commanda à Chriſante de ne dire point quelle avoit eſté la reſponce qu’Ortalque avoit aportée ; de peur que les Soldats n’en fuſſent eſpouventez, & ne perdiſſent cette confiance, qui fait faire les Grandes choſes à la guerre. En ſuite il fit venir Tigrane, Phraarte, & le gouverneur du Chaſteau d’Hermes, avec qui il confera de quelque choſe qui regardoit la guerre & le Prince Artamas ; & à l’heure meſme montant à cheval, ſuivy de ces deux Princes, de Chriſante, de Soſicle, de Tegée, d’Artabaſe, d’Aduſius, de Madate, d’Artabaſe, d’Ortalque, & de Ligdamis, qui voulut aller avecque luy : il reprit les cent cinquante chevaux qu’il avoit laiſſez auprés du Chaſteau d’Hermes, & s’en retourna an Camp ; l’ame ſi accablée de douleur, qu’il luy fut impoſſible tant que ce chemin dura, de deſtacher ſon eſprit pour un inſtant ſeulement, de toutes les funeſtes penſées que la multitude de tant d’evenements fâcheux luy donnoient. De ſorte que Mandane captive, Mandane infidelle, & le Roy d’Aſſirie heureux, furent les ſeuls entretiens de Cyrus, depuis le Chaſteau d’Hermes, juſques à ſa Tente.