comme cette Perſonne luy nomma preſque toutes les Belles de la Cour, elle n’en trouva pas une qu’elle euſt aprouvé que Cleandre euſt aimée : & la choſe alla ſi loing, que cette Fille qui s’appelle Cyleniſe, & qui eſt fort bien avec la Princeſſe, ſe mettant à rire : mais Madame, luy dit elle, vous ne voulez donc pas que Cleandre ſoit amoureux : ou vous voulez qu’il le ſoit beaucoup au deſſus ou beaucoup au deſſous de luy : car je vous ay nommé toutes les perſonnes vers leſquelles raiſonnablement en l’eſtat qu’eſt : ſa fortune preſentement il peut tourner les yeux. Vous avez raiſon, luy dit la Princeſſe Palmis en rougiſſant, mais c’eſt que je ne cherche pas une Maiſtresse de Cleandre proportionnée à ſa condition, puis qu’il ne la sçait pas luy meſme : ny à ſa fortune, qui n’eſt encore que mediocre : mais à ſa vertu, qui eſt fort extraordinaire : & c’eſt ce qui fait ſans doute que je ne devine point qui il aime, parce que je ne trouve rien digne de ſon affection, parmy toutes celles que vous m’avez nommées : & qu’ainſi je concluds qu’il faut qu’il aime au deſſous de luy. Voila, Madame, quels eſtoient les ſentimens de la Princeſſe de Lydie pour Cleandre : qui ſe trouva encore diverſes fois fort embarraſſé à luy répondre. Car ſe ſouvenant qu’elle luy avoit dit qu’il découvriroit de qui il eſtoit amoureux, lors qu’il ſeroit broüillé avec la perſonne qu’il aimoit : elle luy demandoit touſjours en riant, quand l’occaſion s’en preſenteroit, s’il n’eſtoit point encore mal avec ſa Maiſtresse : & s’il ne ſeroit point bien toſt en termes de reveler ſon ſecret ? Si je vous l’aurois revelé, luy dit-il un jour, j’y ſerois ſans doute fort mal : mais tant que je ne vous le diray pas, je ne