Il voulut meſme taſcher de gagner Anaxilée, mais il luy fut impoſſible : à cauſe qu’elle avoit un ſecret dépit dans le cœur, de ce qu’il avoit refuſé de feindre dé l’aimer : tant parce que par là il avoit dépoſé ſa fortune, que parce qu’il luy ſembloit qu’il y avoit eu quelque choſe de mépriſant pour elle dans ce refus. Cleandre ſe voyant donc deſesperé de rien obtenir de l’un ny de l’autre, fut tenté cent & cent fois de quereller Adraſte, & d’en deffaire la Princeſſe Palmis, par une voye plus violente que celle qu’elle ſouhaittoit : mais sçachant bien qu’elle n’approuveroit pas cette action, & qu’apres cela il faudroit la perdre pour touſjours : il retenoit ſa jalouſie & ſa colere, & ſouffroit un mal incroyable. Ce qui le faiſoit encore deſesperer, eſtoit que durant qu’il agiſſoit pour cette affaire, la Princeſſe, ſuivant ce qu’ils avoient reſolu enſemble, mal-traittoit ſi fort Arteſilas, que Cleandre n’en auroit pas eſté peu conſolé, ſi le mauvais ſuccés de ſa negociation n’euſt troublé toute ſa joye.
Cependant il falut qu’il allait luy en rendre conte : il y fut donc un matin, mais il y fut avec tant de marques de douleur dans les yeux, qu’elle connut dés qu’il entra dans ſa chambre, la réponce qu’il avoit à luy faire. Je vous entens bien Cleandre (luy dit-elle, lors qu’il fut aſſez prés pour luy pouvoir parler ſans eſtre entenduë de ſes Femmes) le Prince mon Frere prefere Adraſte à mon repos & à vos prieres, & ne veut point changer d’avis. Je ſuis au deſespoir. Madame, repliqua-t’il, d’eſtre forcé de vous avoüer que j’ay agy inutilement : & alors il luy raconta exactement tout ce qu’il avoit fait & tout ce qu’il avoit dit, pour faire reüſſir ſon deſſein. Mais Madame, luy dit-il, Adraſte a peut eſtre
