Encore une fois, Madame, luy dit il d’une maniere tres touchante, voulez vous que Cyrus ne ressuscite point ? il est prest de vous obeïr. Ouy adorable Princesse, Cyrus qui peut troubler le repos de toute l’Asie ; & esperer de regner sur un grand & beau Royaume ; est prest de renoncer à tous les droits qu’il a à la Couronne de Perse : & de passer le reste de ses jours sous le Nom d’Artamene ; pourveû qu’il puisse esperer que Mandane ne l’en estimera pas moins. Que s’il est vray qu’il faille porter un Sceptre pour vous meriter, choisissez en quel lieu de la Terre vous voulez que j’aille exposer ma vie pour en aquerir un ; je le seray sans doute : & les choses les plus impossibles me paroistront aisées ; pourveû que vous ne m’ostiez pas l’esperance d’estre aimé de vous. Parlez donc divine Princesse : voulez vous que Cyrus ressuscite ? voulez vous qu’Artamene vive ? ou voulez vous qu’ils meurent tous deux ? je vous donne le choix de ces trois choses : parlez donc de grace, & ne me cachez pas vos veritables sentimens. Encore une fois, voulez vous que Cyrus sorte du Tombeau ? je n’oserois le luy conseiller, reprit la Princesse, & je craindrois qu’il n’y rentrast pour tousjours. Voulez vous donc qu’Artamene vive, comme n’estant qu’Artamene ? repliqua t’il. Il ne seroit pas juste, respondit elle, & mesme il ne luy feroit pas avantageux. Vous voulez donc, reprit il, Madame, qu’ils meurent tous deux à la fois ? Nullement, respondit elle, & j’ay eu trop de douleur de la mort d’Artamene, pour esperer de pouvoir me consoler de celle de Cyrus & de la sien ne tout ensemble. Que voulez vous donc qu’ils deviennent ? Repliquat-il ; je n’en sçay rien, luy respondit elle ; & je vous demande quelques jours pour m’y resoudre. Mais du moins, Madame,
bufdo %s@\<en sorte@en sorte@ge | update
