pas, dit alors Indathirse, qu’il y en ait guere de cette nature : les choses les plus particulieres, viennent tousjours à estre sçeües de tout le monde : mais si je ne me trompe, adjousta-t’il, nostre impatience de sçavoir ce qui vous amene icy n’est guere plus forte, que celle que vous devez avoir de la fin de vostre negociation. Car apres tout, la Cour de Thomiris, quoy que tres belle pour nous autres Scithes, qui faisons profession ouvertement d’estre Ennemis declarez de la magnificence, ne la doit point estre pour vous : qui avez sans doute veû la Cour de Medie, & qui vivez en celle de Capadoce, où l’on dit que toutes choses sont & plus superbes, & plus galantes qu’icy. Mon Maistre qui creut encore leur faire une civilité, fortifia leur jalousie lors qu’il leur dit, j’advoüe que la Capadoce a des charmes pour moy, qui ne sont pas mediocres : mais j’advoüe aussi en mesme temps, que toute personne libre & raisonnable, ne peut manquer d’en trouver aussi de fort grands, en la Cour de Thomiris : & quand au lieu d’estre en un aussi beau Païs qu’est le sien, elle regneroit sur ces Peuples qui sont au pied du Mont Imaüs, parmy des rochers & des precipices : elle seule rendroit tousjours le lieu ou elle seroit, infiniment agreable : & empescheroit sans doute que les Ambassadeurs qu’elle feroit attendre long temps, ne s’ennuyassent aupres d’elle. Comme nous sommes Estrangers aussi bien que vous, reprit Indathirse, ce n’est pas à nous à vous faire compliment sur les loüanges que vous donnez au Païs des Massagettes : & pour ce qui regarde la Reine, adjousta Aripithe, ce n’est pas non plus à nous à luy aprendre ce que vous dittes à son avantage : y ayant beaucoup d’apparence qu’estant aussi