Bien eſt il vray que les ordres qu’il envoya à Aribée, de faire des levées dans ſon Gouvernement, ne le fortifierent pas beaucoup : car ce traiſtre en avoit affaire pour d’autres deſſeins. Il faiſoit pourtant ſemblant d’executer les volontez du Roy : & faignant de ſe trouver mal, il ne vint point à Themiſcire. Cependant nous sçeuſmes par le retour de celuy que l’on avoit envoyé vers la Reine Nitocris, qu’elle deſadvoüoit faction du Prince d’Aſſirie : & qu’en effet il n’eſtoit point allé à Babilone. En ce meſme temps, ceux que nous avions laiſſez parmy les Maſſagettes revindrent : & nous aprirent que Gelonide les avoit fait ſauver quinze jours apres noſtre départ. Ils apporterent une Lettre de cette vertueuſe Femme à Artamene : par laquelle elle luy diſoit en general, que ſon abſence avoit bien cauſé du trouble à la Cour de Thomiris. Que neantmoins elle n’avoit pas eu beaucoup de peine à obtenir la liberté des ſiens : la Reine luy ayant dit qu’il n’y avoit que le retour & le repentir d’Artamene qui la peuſt ſatisfaire, ou que ſa mort qui la peuſt vanger. Mais à peine nous fuſmes nous reſjoüis du retour des noſtres, que nous apriſmes qu’Aſtiage eſtant deſja aſſez malade, lors qu’on luy avoit apris l’enlevement de Mandane, par le Prince d’Aſſirie ; en avoit eſté ſi touché, tant pour Pintereſt du Roy de Capadoce ſon fils, que pour la haine qu’il portoit aux Aſſiriens ; que la fiévre luy en avoit redoublé, & qu’il eſtoit mort quatre jours apres : declarant qu’il vouloit que tous Ces Subjets priſſent les armes pour la liberté de la Princeſſe Mandane. La nouvelle de cette mort, penſa faire refondre mon Maiſtre à ſe deſcouvrir à Ciaxare pour ce qu’il eſtoit : mais quand il venoit à ſe ſouvenir de tout ce qu’il luy avoit entendu dire parlant de Cyrus,
