pas qu’Artamene eſtant monte en diligence au haut de cette Tour ; croyant que ce fuſt ſa Princeſſe, ne trouva que ſon Rival en ce lieu là : & vous sçavez ſans doute auſſi, comment mon Maiſtre vit une Galere, dans laquelle le Roy d’Aſſirie luy dit que le Prince Mazare enlevoit Mandane.
Enfin, Feraulas qui voulut principalement faire connoiſtre à ces Princes, que ſon Maiſtre n’avoit pas eu une intelligence criminelle avec le Roy d’Aſſirie : Apres leur avoir conté toutes les agitations d’eſprit de ces deux Rivaux, pendant qu’ils regardoient cette Galere du haut de cette Tour, & que la tempeſte duroit : leur raconta fort exactement toute la converſation du Roy d’Aſſirie & d’Artamene, ſur le haut de cette meſme Tour : leur faiſant comprendre que la promeſſe qu’Artamene avoit faite. n’eſtoit point contre le ſervice du Roy : & que l’intereſt de ſon amour, eſtoit la ſeule choſe, qui luy avoit fait ſupprimer la lettre du Roy d’Aſſirie. En ſuitte il leur repaſſa legerement la ſuitte de ce Prince à Pterie ; comment il avoit eſcrit à Artamene ; & la raiſon pour laquelle Artamene avoit caché cette Lettre à Ciaxare. Pat quelle voye ſa reſponse eſtoit venüe entre les mains du Roy : comment Artamene avoit creû & croyoit preſque encore abſolument que la Princeſſe avoit pery. Comment il avoit trouvé Mazare à demy noyé : & enfin tout ce qui eſtoit advenu juſques à l’arrivée de Ciaxare, & juſques à la priſon d’Artamene. En ſuitte dequoy, il les conjura de regarder ce qu’il eſtoit à propos de faire, pour la conſervation d’un homme ſi illuſtre. Car, leur dit il, Seigneurs, tout ce que Chriſante & moy
