paru eſtre extrémement ſatisfaite en ſon Mariage : & ayant fort bien veſcu avec le Roy ſon Mary. Cependant elle voulut que Gadare luy obeïſt, & qu’il s’en allaſt à la Province qui eſtoit à luy, pour n’en revenir jamais. Ce n’eſt pas que le Roy qui sçeut la choſe, & qui connoiſſoit parfaitement la vertu de cette Princeſſe, ne vouluſt l’obliger plus d’une fois, à ſouffrir que Gadate revinſt à Babilone : mais elle ne le voulut jamais endurer. Quelque temps apres ſon Mariage, elle fit meſme commander à Gadate de ſe marier : & d’eſpouser une Princeſſe deſcenduë des anciens Rois de Bithynie, qui eſtoit extrémement riche, & infiniment vertueuſe : ce qu’il fit, quoy qu’aſſurément il conſervast touſjours pour la Reine une violente paſſion. Il veſcut pourtant auſſi bien avec la Princeſſe ſa femme, que la Reine avec le Roy ſon Mary : Cependant Nitocris eut un Fils, qui eſt celuy que vous connoiſſez, & que nous avons veû tantoſt Philidaſpe, & tantoſt Roy d’Aſſirie. Gadate eut auſſi un Fils & une Fille : & auſſi toſt qu’ils furent hors de la premiere enfance, la Reine qui eſtoit demeurée Veuſve, en continuant de deffendre à Gadate de revenir à la Cour, luy fit commander de luy envoyer ſes Enfans : afin que ſon Fils qui ſe nommoit Intapherne, fuſt eſlevé aupres du Prince d’Aſſirie ; & que la jeune Princeſſe ſa Fille nommée Iſtrine, fuſt en lieu où elle peuſt un jour donner de l’amour au Prince ſon Fils, à qui elle avoit deſſein de la faire eſpouser. Tant pour ſatisfaire à la loy, en le mariant à une Princeſſe qui n’eſtoit pas Eſtrangere, que pour rendre ce teſmoignage d’eſtime à Gadate : luy ſemblant qu’elle ne pouvoit mieux, ny plus innocemment reconnoiſtre les ſervices qu’il luy avoit rendus, qu’en mettant ſa Fille ſur le Throſne d’Aſſirie.
