s’eſtre vaincu luy meſme : & d’eſtre en quelque façon contraint de delivrer Artamene. Il avoit pourtant encore aſſez de chagrin de ne pouvoir preciſement sçavoir quelle avoit eſté cette intelligence qu’il n’avoit pu deſcouvrir : Mais apres tout, le rare merite d’Artamene ; les grandes choſes qu’il avoit faites ; les obligations qu’il luy avoit, & la neceſſité preſente qu’il avoit de ſa valeur, l’emporterent ſur ſon eſprit : & il ſe reſolut en effet à delivrer Artamene, le jour meſme qu’il ſeroit marcher ſon Armée pour aller en Armenie.
Mais pendant qu’il eſtoit dans une reſolution ſi avantageuſe pour luy, ſi utile pour la Princeſſe ſa Fille ; ſi agreable pour cét illuſtre Priſonnier ; & ſi capable de cauſer une alegreſſe publique en la plus belle & la plus grande partie de l’Aſie, qui s’intereſſoit alors en ſa fortune : Metrobate ſeul, cét Ennemy caché d’Artamene, & cét ancien Amy d’Aribée, en avoit une douleur extréme. Comme cét homme avoit une ame ambitieuſe, qui ne ſe ſoucioit pas par quelle voye il parvinſt à la Grandeur, pourveû qu’il y arrivaſt : il y avoit eu pluſieurs choſes en ſa vie qui avoient obligé Artamene à ne l’eſtimer point, durant qu’il eſtoit dans ſa plus grande fortune : & par conſequent, à ne luy faire pas tout le bien qu’il faiſoit à d’autres. Car Artamene eſtoit perſuadé ; que c’eſt faire une notable injuſtice aux Gens d’honneur malheureux ; que d’accabler de biens ceux qui ne le meritent pas, & de laiſſer les autres dans la miſere. Metrobate de plus s’eſtant trouvé attaché à la fortune d’Aribée, avoit ſuivy tous ſes ſentimens : & Artamene l’ayant fait perir preciſément dans le temps que Metrobate eſtoit ſur le point de recevoir la recompenſe de tous les ſervices qu’il luy avoit rendus : cét homme en avoit l’eſprit ſi
