pierre, pour s’oppoſer au ſecours que le Roy d’Armenie vouloit y donner ; il fut avec les quatre mille autres attaquer le Bourg, dans le quel l’on avoit jetté trois mille Soldats, qui s’eſtoient retranchez quelques tours auparavant que Cyrus arrivaſt à la veuë d’Artaxate. Cette attaque ſe fit par trois endroits à la fois, apres que quatre Beliers eurent abatu la Barricade & la Muraille : mais avec tant de vigueur, que les Ennemis en furent d’abord eſpouvantez. L’on euſt dit à voir agir Cyrus, qu’il eſtoit invulnerable, veû comme il s’expoſoit à la greſle des traits des Ennemis. La premiere Attaque eſtoit commandée par le Prince Thraſibule : la ſeconde par Hidaſpe : & la troiſiesme par Aglatidas : car pour Cyrus il voulut ſe reſerver la liberté d’aller combattre ceux de la Ville, s’ils avoient la hardieſſe de vouloir venir ſecourir ce Chaſteau. D’abord la premiere Barricade fut emportée, du coſté qu’eſtoit Cyrus : & ceux qui la defendoient, fuyant avec precipitation juſques à la ſeconde, y furent tuez, & ſervirent encore à faire forcer les autres par l’effroy que leur deffaite leur donna. Pendant cela non ſeulement l’attaque de Thraſibule reüſſit de meſme, & celle d’Aglatidas auſſi : mais les Soldats encore animez par l’exemple de leur vaillant Chef, planterent des échelles contre les Murs, dont les Beliers avoient deſja abatu une partie : de ſorte que tout d’un coup les Soldats & les Habitans de ce lieu là ſe virent envelopez de toutes parts, & contraints de fuïr pour ſauver leur vie. Les uns jettent leurs armes & ſe rendent : les autres fuyent en tumulte & en deſordre : quelques uns pour eſviter l’Eſpée de l’Ennemy qui les pourſuit, trouvant le Pont trop eſtroit & trop embarraſſé pour tant de monde, ſe jettent
