Chalcedoine au Roy de Pont : qu’on luy laiſſeroit la Ville de Chriſopolis, & tout le Païs d’alentour pour en jouïr comme Vaſſal de ce Prince : & qu’il ne ſeroit point obligé ny de demeurer, ny d’aller à Heraclée, ny d’y envoyer meſmes les Princes ſes Enfans. Avant ce Traité, le Prince Sinneſis avoit fait toutes choſes poſſibles pour obliger le Roy ſon Pere à ſouffrir que les Mariages qu’il avoit eu deſſein de faire s’achevaſſent ; mais il n’y voulut jamais entendre : ce qui affligea ſi extraordinairement le Prince Sinneſis, qu’il n’en eſtoit pas connoiſſable. Cependant nous aprenions touſjours que Spitridate eſtoit en priſon, & meſme plus rigoureuſe qu’à l’ordinaire : car depuis le retour de celuy qui portoit la Lettre de la Princeſſe Araminte, dont Arſamone avoit eu quelque ſoubçon, la Princeſſe Ariſtée ne le voyoit plus : ce qui ne donnoit pas un petit redoublement d’inquietude, ny au Prince Sinneſis, ny à la Princeſſe Araminte : qui n’avoient point d’autre conſolation que celle de ſe pleindre enſemble. Pharnace qui n’avoit pas ſon Protecteur à Heraclée, ne parloit pas ſouvent à la Princeſſe : & Artane meſme avec toute ſon inſolence & toute ſon adreſſe, ne trouvoit gueres ſouvent l’occaſion de l’entretenir. Neantmoins comme Pharnace eſtoit en chagrin de ſon malheur, quoy qu’Artane ne luy fuſt pas un Rival redoutable, il ne laiſſa pas de le mal-traiter à diverſes fois : dans les premieres, ce laſche agit encore ſi adroite ment : qu’il ne ſembloit pas qu’il manquaſt de cœur : mais aux dernieres injures qu’il reçeut de Pharnace, ayant eſté contraint malgré qu’il en euſt, de mettre l’Eſpée à la main contre luy ; il ſe deſhonnora beaucoup plus en ſe batant, qu’il n’avoit fait en ne ſe batant pas : & l’averſion de la Princeſſe
