SONNET.
Ie chante & pleure, & veux faire & defaire,
I’oſe & ie crains, & ie fuis & ie ſuis,
I’hurte & ie cede, & i’ombrage & ie luis,
I’arreſte cours, ie ſuis pour & cõtraire,
Ie veille & dors, & ſuis grand & vulgaire,
Ie bruſle & gele, & ie puis & ne puis,
I’aime & ie hai, ie conforte & ie nuis
Ie vis & meurs, i’eſpere & deſeſpere :
Puis de ce tout eſtreint ſoubs le preſſoir,
I’en tire un vin ores blanc, ores noir,
Et de ce vin i’enjure ma pauure ame,
Qui chancelant d’vn & d’autre coſté,
Va & reuient comme eſquif tempeſté
Veuf de nocher, de timon & de rame.
MVZAIN.
Beau néz la colline d’Amour,
Où touſiours les neiges blãchiſſẽt,
Sur qui Venus faits ſon ſeiour,
Et ſur qui les graces fleuriſſent :
Beau nez la borne que les Dieux
Mirent entre les viues flammes
De ces brandons audacieux,
Pour garder la Terre & les cieux,
Vous eſtes l’Olympe des ames.